زانکۆی کۆمار ڕاهێنانێکی یەک هەفتەیی بۆ مامۆستایان ئەنجامدا سەبارەت بە پڕۆسەی دڵنیایی جۆری و گەشەپێدانی بەردەوام
یەکەی دڵنیایی جۆری لە زانکۆی کۆمار بۆ زانست و تەکنەلۆجیا لەم دواییانەدا ڕاهێنانێکی گشتگیری یەک هەفتەیی بۆ مامۆستایانی زانکۆی کۆمار ڕێکخست. ئەم دەستپێشخەرییە سەرنجی خستە سەر باشترکردنی شێوازەکانی وانەوتنەوە و هاوتەریبکردنی چالاکییە ئەکادیمییەکان لەگەڵ پابەندبوونی زانکۆکە بە کوالیتی خوێندن و ئامانجەکانی گەشەپێدانی بەردەوامی نەتەوە یەکگرتووەکان.
ڕاهێنانەکە چەندین بابەتی جۆراوجۆری لە خۆگرتبوو، لەوانە ئەو شێوازی فێرکردنە ناوازەیەی کە لە زانکۆی کۆمار پەیڕەو دەکرێت و گرنگی فێربوونی کارەکی و گفتۆکردن لەسەر شێوازە نەخوازراوەکانی فێرکردن. هەر لە ڕاهێنانەکەدا گرنگییەکی تایبەت بە داڕشتنی پرسیاری کاریگەری تاقیکردنەوە و گرنگیدان بە تەندروستی دەروونی فێرخوازان لە ژینگەی فێربووندا درا.
بەدرێژایی هەفتەکە، بەشە جیاوازەکان بە پێشکەشکردنی پلانی ستراتیجی خۆیان بۆ بەرزکردنەوەی کوالیتی خوێندن چالاکانە بەشداریان کرد. ئەم پلانانە بریتی بوون لە ڕێکخستنی کۆنفرانسی ئەکادیمی و چالاکییە زانستییەکانی دیکە کە پاڵپشتی ئامانجەکانی زانکۆی کۆمار بۆ زانست و تەکنەلۆجیا دەکەن. هەروەها هەر بەشێک پلانی خۆیان پێشکەش کرد سەبارەت بە چۆنێتی بەشداری کردن لە ئامانجەکانی گەشەپێدانی بەردەوام لە ڕێگەی پراکتیکە پەروەردەییەکانەوە.
جگە لەوەش، مامۆستایان پڕۆگرامی خوێندنیان بۆ وانەکانی خۆیان خستەڕوو کە ڕەنگدانەوەی پابەندبوونیان بوو بە باشترکردنی بەردەوام و هاوتەریب لەگەڵ هەردوو ئامانجی پەروەردەیی زانکۆی کۆمار و هەوڵە جیهانیەکان بۆ گەشەپێدانی بەردەوام.
