بەرزڕاگرتنی ڕۆژی جیهانی زمانی دایک لە زانکۆی کۆمار بۆ زانست و تەکنەلۆجیا
ڕۆژی چوارشەممە ٢١ی شوباتی ٢٠٢٤ زانکۆی کۆمار بۆ زانست و تەکنەلۆجیا ڕۆژی جیهانی زمانی دایکی بەرز ڕاگرت، کە بۆنەیەکی جیهانی تایبەتە بە بەرەوپێشبردنی هەمەچەشنی زمانەوانی و کولتووری.
بەو پێیەی کە زانکۆی کۆمار پاشخانی زمان و کلتوری جیاوازی تێدایە، چالاکییەکە جەختی لەسەر گرنگی پاراستنی ئەو زمانانە کردەوە کە خەڵک لە سەرانسەری جیهاندا قسەیان پێدەکەن. زمانی کوردی کە بە میراتی دەوڵەمەندی کولتووری ناسراوە، لە پێشەنگی بۆنەکەدا بوو بە پێشکەشکردنی میوزیک لەلایەن کۆمەڵێک فێرخوازی زانکۆی کۆمارەوە بە شێوە زاری جیاواز.
لە سەرەتادا چالاکییەکە بە وتەیەکی بەخێرهاتن لەلایەن پرۆفیسۆر دکتۆر کاوس عەزیز فەرەج، جێگری سەرۆکی زانکۆ بۆ کاروباری ئەکادیمی و فێرخوازان دەستیپێکرد. هەروەها زنجیرەیەک سیمینار لە لایەن چەند ئەکادیمیەکی بەڕێز پێشکەش کرا، لە نێویاندا پرۆفیسۆر دکتۆر ئاڤێستا کەمال لە زانکۆی سلێمانی کۆلێژی زمان و ئەدەب و مامۆستا هەرێم عوسمان مامۆستا لە زانکۆی کۆمار بۆ زانست و تەکنەلۆجیا.
لە بەردەوامی چالاکییەکەدا، هەژان قادر، فێرخواز و وەرگێڕ لە بواری پزیشکیدا، وتارێکی لەسەر ئەزموونی خۆی وەک وەرگێڕی بواری پزیشکی پێشکەش کرد و لە کۆتاییدا واژۆی لەسەر کتێبەکانی کرد. هەژان قادر لە ماوەی دوو ساڵی ڕابردوودا بە وەرگێڕانی دوو کتێب بەشدارییەکی بەرچاوی کردووە لە کایەی وەرگێڕان لە بواری پزیشکیدا، کە گرنگیی کارامەیی زمانەوانی لە ئاسانکاری ئاڵوگۆڕی زانستدا پیشان دەدات.
