زانکۆی کۆمار بەشداری لە دیداری پێداچوونەوە بە خولی پێداگۆجی دەکات کە لە زانکۆی سلێمانی بەڕێوەچوو
لە ٣ی ئازاری ٢٠٢٤، دیداری پێداگۆجی لە زانکۆی سلێمانی ئەنجامدرا، کە چەند کەسایەتییەکی بواری خوێندنی باڵا ئامادەی بوون. د.ئامانج عەبدوڵڵا سەعید ڕاوێژکاری وەزیری خوێندنی باڵا و توێژینەوەی زانستی لەگەڵ د.ژاڵە سەعید خەتات بەڕێوەبەری گشتی فەرمانگەی توێژینەوە و پەرەپێدان و د. زانا مەحمود حەسەن جێگری سەرۆکی زانکۆی سلێمانی بۆ کاروباری زانستی و خوێندنی باڵا، لەم دیدارەدا ئامادە بوون. ئەم چالاکییە لەلایەن وەزارەتی خوێندنی باڵا و توێژینەوەی زانستی بە هاوکاری زانکۆکانی دهۆک، هەولێر، و سلێمانی ڕێکخرابوو.
ئەم کۆبوونەوەیە بە تایبەتی بۆ بەشداریکردنی ڕاهێنەرانی خولی سێیەمی پێداگۆجی ڕێکخرابوو، بە ئامانجی هەڵسەنگاندنی وردی خولەکانی پێداگۆجی کە لە ئێستادا بەڕێوە دەچێت. گفتوگۆکان لەسەر هەڵسەنگاندنی دەرئەنجامەکانی خولەکە و تاوتوێکردنی گۆڕانکارییە پێویستەکان بوو بۆ بەرزکردنەوەی ڕاهێنانی پێداگۆجی لە داهاتوودا.
د.توانا عەبدولڕەزاق وەک نوێنەری زانکۆی کۆمار بۆ زانست و تەکنەلۆجیا بەشداری کرد، چەند تێڕوانینێکی بەنرخی لە گفتوگۆکاندا ثێشکەش کرد. لە کۆبوونەوەکەدا جەخت لەسەر پابەندبوونی کۆمەڵگەی ئەکادیمی هەرێمی کوردستان کرایەوە بۆ بەرزکردنەوەی کوالیتی خوێندنی باڵا لەڕێگەی پێشکەوتنی خولەکانی پێداگۆجیی.
