زانکۆی کۆمار سیمپۆزیۆمێکی نێودەوڵەتی لەسەر کاریگەری دەروونناسی لەسەر کوالیتی سیستەمی پەروەردە ئەنجامدا
ڕۆژی ١٨ی شوباتی ٢٠٢٤، یەکەی ڕاوێژکاری دەروونی لە زانکۆی کۆمار بۆ زانست و تەکنەلۆجیا، سیمپۆزیۆمێکی نێودەوڵەتی بەناونیشانی “کاریگەری دەروونناسی لەسەر کوالیتی سیستەمی پەروەردە” سازکرد کە لە لایەن د. شەهلا علی سەرپەرشتی کرا. سیمپۆزیۆمەکە تێڕوانینێکی گرنگی لەبارەی پەیوەندی دەروونناسی و پراکتیکەکانی پەروەردەیی خستەڕوو. ئەم چالاکیە زانستییە وەک سەکۆیەکی گرنگ بۆ مامۆستایان و پزیشکانی بوارە پەروەردەییە جیاوازەکان بوو، کە جەختی لەسەر گرنگی بنەما دەروونییەکان لە بەرزکردنەوەی کوالیتی پەروەردەدا کردەوە.
بە گرنگیدان بە کاریگەرییە بەرچاوەکانی دەروونناسی لەسەر سیستەمی پەروەردەیی، سیمپۆزیۆمەکە چەند سیمینارێکی گرنگی لە خۆ گرت کە لە لایەن شارەزایانی بوارەکە پێشکەشکران. دکتۆر لوقمان سیوەیلی لە سیمینارەکەیدا باسی لە بنەما فەلسەفییەکانی پەروەردە کرد، و دکتۆر سامان ماملێس باسی لەو ئاڵانگاریە ئەکادیمییە زەقانە کرد کە ئەمڕۆ ڕووبەڕووی خوێندکاران دەبنەوە. جگە لەوەش، دکتۆر سێنا باسی لە چەند ستراتیجێکی گرنگ کرد پەیوەست بە دەروونناسی خوێندکارانەوە، تا مامۆستایان بتوانن بە شێوەیەکی کاریگەر و پیشەیی پەیوەندی لەگەڵ فێرخوازان دروست بکەن.
لە کۆتایی چالاکیەکەدا، پانێڵێک ئەنجامدرا کە کۆمەڵێک بابەتی جیاوازی تێدا باسکرا، لەوانە بەربەستە دەروونییەکان لە ژیانی مۆدێرندا و کاریگەری ژینگەکانی فێربوون لە ڕوانگەی دەروونییەوە و لایەنە فەلسەفییە بنەڕەتییەکانی پەروەردە. ئەم چالاکییە دەرفەتێکی بە نرخ بوو بۆ کۆمەڵگەی ئەکادیمی و پیشەیی بۆ ئاڵوگۆڕی بیرۆکە و دەستنیشانکردنی ڕەوتی نوێ لە بواری پەروەردەدا، هەروەها ڕێگەخۆشکەر بوو لە پەیبردن بە پێشکەوتنەکانی داهاتوو لە کەرتی پەروەردەدا.
