زانکۆی کۆمار یاداشتنامەی لێکتێگەیشتنی لەگەڵ دامەزراوەی PJT واژۆ کرد

ڕۆژی 12ی ئەیلولی 2023، زانکۆی کۆمار بۆ زانست و تەکنەلۆجیا، یاداشتێکی لێکتێگەیشتنی لەگەڵ دەزگای سەرۆک جەلال تاڵەبانی (PJTF) واژۆ کرد. ئەم یاداشتە سەرەتای پەیوەندییەکی ستراتیجییە لە نێوان هەردوو لایەندا کە ئامانج لێی پەرەپێدانی هاوکاری و گەشەپێدانی کۆمەڵگایە. مەبەست لە یاداشتەکە بە شێوەیەکی سەرەکی کارکردنە لەسەر ئەو دەستپێشخەریانەی کە زانیاری و ئەزموونی دوو لایەنە هاوبەشی پێ دەکەن کە بۆشایی لە بوارە جیاوازەکاندا پڕدەکەنەوە.

سەرۆکی زانکۆی کۆمار دکتۆر سەڵاحەدین سەعید عەلی و جێگری سەرۆکی زانکۆی کۆمار بۆ کاروباری ئەکادیمی و فێرخوازان دکتۆر کاوس فەرەج بەخێرهاتنی شاندەکەیان کرد و پێکەوە گەشتێکیان بە ناو زانکۆدا کرد بۆ بینینی بەشە جیاوازەکانی زانکۆکە لەوانە تاقیگەی پێشکەوتوو و زۆر بەشی سەرەکی تری ناو کەمپەکە. دوای گەشتەکە هەردوو لایەن یاداشتنامەکەیان واژۆکرد، کە ئاماژەیە بۆ پابەندبوونیان بە داهاتوویەکی پڕ کاری پێکەوەیی.

شاندەکە دوو بابەتیان پێشکەشکرا لەسەر سیستەمی خوێندن و وەرگرتن لە لایەن بەڕێزان مامۆستا ڕەنجدەر لە یەکەی دڵنیایی جۆری و مامۆستا بەمۆ لە یەکەی کار و باری فێرخوازان تا تێگەیشتنێکی باشتریان هەبێت لەسەر پرۆسەی خوێندن و وەرگرتن لە زانکۆی کۆمار.