زانکۆی کۆمار یادی ٢٤٠ ساڵەی دامەزراندنی شاری سلێمانی بەرز ڕاگرت
لە ١٤ی تشرینی دووەمی ٢٠٢٤، زانکۆی کۆمار بۆ زانست و تەکنەلۆجیا، ساڵیادی دامەزراندنی شاری سلێمانیی بە بۆنەیەک بەرز ڕاگرت کە تێیدا فێرخوازان و مامۆستایان و ستافی زانکۆ بەشدار بوون و ڕۆژێکی پڕ لە مۆسیقا و گفتوگۆی سەرنجڕاکێش و شیعریان بەسەربرد.
یادەکە بە وتارێکی پرۆفیسۆر د.کاوس عەزیز فەرەج، جێگری سەرۆکی زانکۆ بۆ کاروباری فێرخوازان و ئەکادیمی دەستیپێکرد، کە تێیدا تێڕوانینەکانی لەبارەی بەربەستە مێژووییەکانی سلێمانی و ئەو کەسایەتییە کاریگەرانەی کە بەدرێژایی ساڵان ناسنامەی شارەکەیان دەوڵەمەند کردووە، خستەڕوو.
هەر لە بۆنەکەدا، خاتوو ئاسۆس جاف، بەڕێوەبەری پەیمانگای ناحکومی هونەرە جوانەکان، وتارێکی لەسەر ڕۆڵی ژنان لە فەزای هونەری شاری سلێمانی پێشکەش کرد. لە وتارەکەیدا بەڕێزیان جەختیان لەسەر ئەوە کردەوە کە چۆن ژنان بەشدارییەکی کارا و بەرچاویان لە گەشەپێدانی هونەری شارەکەدا کردووە.
دوابەدوای وتاری خاتوو ئاسۆس، دکتۆر هێمن کەریم، مامۆستا لە زانکۆی کۆمار بۆ زانست و تەکنەلۆجیا، بابەتێکی تێروتەسەلی لەبارەی پەرەسەندنی کولتووری لە شاری سلێمانی پێشکەش کرد، بەڕێزیان بەتایبەتی تیشکیان خستە سەر ڕۆڵی هونەر و شیعر لە داڕشتنی کارەکتەری شارەکەدا. قسەکانی بەڕێزیان ڕۆشنایی خستە سەر ئەوەی کە چۆن ئەم جۆرە دەربڕینانە ڕەگ و ڕیشەی سلێمانییان بە درێژایی نەوە جیاوازەکاندا پاراستووە.
بۆ کۆتایی هێنان بە ئاهەنگەکە، فێرخوازە بەتواناکانی زانکۆی کۆمار هاتنە سەر شانۆ و چەند گۆرانیەکی فۆلکلۆری نەریتی کوردییان پێشکەش کرد و وەک هەمیشە نمایشەکانیان کەشێکی زیندوویان لە ناو ئامادەبوان دروستکرد.
